baarish huii to phuulooN ke tan chaak ho gaye

mausam ke haath bheeg ke saffaak ho gaye

baadal ko kyaa Khabar ki baarish kii chaah meiN

kitane buland-o-baalaa shajar Khaak ho gaye

juganuu ko din ke vaqt pakaRney kii zid kareN

bachche hamaare ahad ke chaalaak ho gaye

laharaa rahi hai baRf ki chaadaR haTaa ke ghaas

suuRaj kii shah pe tinake bhii bebaak ho gaye

suuraj dimaaG log bhii iblaaG-e-fikr meiN

zulf-e-shab-e-firaaq ke pechaak ho gaye

jab bh Gariib-e-shahar se kuchh guftaguu hu'ei

lahaje havaa-e-shaam ke nam'naak ho gaye

saahil pe jitane aab-guziidaa they sab ke sab

dariyaa ke ruKh badalate hii tairaak ho gaye