SHIKAAYAT
Ek pal ko
Nazar kya mile raah mein
Ye zamaana bohat door tak soch leta hai
Chaaron taraf
Shor aaisa umaddta hai
Yaaro !
Inhi chehmagoiyon k saffaak aur
Aahani naakhunon se
Dilon pe kuch aaisi kharaashein ubharti hain
Jin se
Ye shaffaaf sheeshe bhi dhundlaane lagte hain
Aaise mein wo aks
Jo k abhi
Theek se dil k sheeshon pe
Ubhra bhi na tha,
Wo jazba k jis ne
Abhi dil k sheeshon ko
Rangeen qaus-e-qaza bakhshni thi
Jila bakhshni thi
Ubharne se pehle hi
Yaaro !
Kharaashon ki is bheerr mein
Wo sisakta hua
Torr jaata hai dam
K zamaana bohat door tak soch leta hai.