This is my first post in the forum, plz read till end!

Bechainiyan ye meri nahi jaanti ke haal-e-sukoon kya cheez hai,
Besabr khwahishen kehteen hai ye sarhadh kya cheez hai.
Guftagoo tumse na ho to din kehta hai “mein kyun aya?”,
Kahani tum na sunao to ye chaandni bhi kya cheez hai.

Mubaarakbad detien hai ye ghadiyaan mujhe jalaane ko,
Barson tumhari yaad mein na jana waqt kya cheez hai.
Dhadkan-e-majboor ko na satao intezaar-e-khaali se,
Dil ko maloom hai ke mohabbat mein, umeed kya cheez hai.

Dekha baagh mein liptee hui bayl ko daali se,
Khayaal aya tera hona mere liye kya cheez hai.
Roshni tumko choone ki ijaazath maangti kyun hai?
Ghuroob-e-aftaab ne kiya zahir key ye ronaq kya cheez hai.

Tere aks ko likh kar jo bayaan karna chahu
Poochti hai ye siyaahi (ink), mere seeney mein kya cheez hai
Aaghaaz-e-bayaan kyun hota nahi tanhai mein,
Tujse parda ho jabtak to ye mehfil bhi kya cheez hai.

Waqt ki lehrein na mitaa sake mujmein teri yaadien,
Kinaare pe gar miljaye to woh moti bhi kya cheez hai.
Justajoo tumse milne ki nahi ab zinda,
Khoobsoorat hai mera tasavvuf to haqeeqat tu kya cheez hai.

Poochta hun mein rah chalte har musafir se
Haath rakh ke mere seeney pe batao ye kya cheez hai.
Khatm hoti nahi mujse ye aadat pilaane ki
Log peekar hi bayaan karte hai ke ye ishq kya cheez hai.

salaam-e-khuloos
special thanks to monica_barbara for helping me join this forum.